सध्या राज्यात कोरोनाचे रुग्ण वाढत असल्याचे प्रमाण अधिक मोठ्या संख्येने आढळून येत आहे. याच पार्श्वभूमीवर कोरोना संदर्भात नियम अधिक कठोरपणे पाळण्याचे आदेश शासनाकडून देण्यात आले होते. मात्र शासन प्रतिनिधीच हे नियम पायदळी तुडवत असल्याचे चित्र आता दिसून येत आहे, असाच काहीसा प्रकार अमरावती जिल्ह्यात घडला आहे.
खासदार नवनीत राणा आणि त्यांचे पती आमदार रवी राणा यांनी काही दिवसांपूर्वी विनामास्क दुचाकीवरून आपल्या कार्यकर्त्यांसोबत शहराचा फेरफटका मारला होता. त्यामुळे कोरोना संदर्भातील नियम न पाळल्यामुळे राणा दाम्पत्यावर कारवाई करण्यात आलेली आहे.
शासनाचे कडक निर्देश असतानाही राणा दाम्पत्याने विनामास्क, विनाहेल्मेट अमरावतीमधील रस्त्यांवरून बुलेटसफर केली होती. हा व्हिडीओ सोशल माध्यमांवर व्हायरल झाला होता. त्यामुळे राणा दाम्पत्याविरोधात टीका होत होती. लोकप्रतिनिधीच असे वागतील तर त्यांचे कार्यकर्ते बेछुट सुटतील असा आरोपही होत होता. आता याप्रकरणी खासदार नवनीत राणा व आमदार रवी राणा यांच्या सह १५ कार्यकर्त्यांवर पोलिसांनी गुन्हा नोंदविला आहे.
राणा यांनी विनामास्क केलेल्या बुलेट सवारीबाबत मात्र पोलिसांनी कुठलीच कारवाई अद्याप केलेली नाही. त्यामुळे मास्क नसल्याने सामान्यांवर कारवाई करणारे प्रशासन आता राणा दाम्पत्याबाबत काय कारवाई करणार, असा प्रश्न उपस्थित होत आहे.
