कल्याणमधील शिवसेना पदाधिकारी तसेच पेशाने बांधकाम व्यावसायिक असलेल्या व्यक्तीविरोधात वीजचोरी प्रकरणी गुन्हा दाखल करण्यात आला आहे. या व्यावसायिकाने नुकतीच तब्बल आठ कोटींची रोल्स रॉयसची कार विकत घेतली होती. महाराष्ट्र राज्य विद्युत वितरण कंपनी लिमिटेडने (एमएसईडीसी) गेल्या आठवड्यात संजय गायकवाड यांच्याविरोधात गुन्हा दाखल केला आहे.
समोर आलेल्या माहितीनुसार अतिरिक्त कार्यकारी अभियंता अशोक बुंधे यांच्या नेतृत्वातील एका पथकाने संजय गायकवाड यांच्या बांधकामांच्या ठिकाणांची पाहणी केली. कल्याणच्या कोळसेवाडीमधील बांधकामाच्या ठिकाणी वीजेचा गैरवापर केला जात असल्याचं यावेळी निदर्शनास आलं होत. यानंतर एमएसईडीसीएलने तात्काळ संजय गायकवाड यांनी ३४ हजार ८४० रुपयांचं बिल पाठवलं. तसंच १५ हजारांचा दंडदेखील ठोठावण्यात आला.
संजय गायकवाड यांनी तीन महिन्यानंतरही रक्कम भरली नसल्याने अखेर अशोक बुंधे यांनी महात्मा फुले पोलीस स्थानकात तक्रार दिली. एमएसईडीसीएलचे प्रवक्ते विजयसिंह दुधभाते यांनी दिलेल्या माहितीनुसार, पोलिसांनी गेल्या आठवड्यात गुन्हा दाखल केल्यानंतर संजय गायकवाड यांनी बिल तसंच दंडाची पूर्ण रक्कम भरली.
