पुणे : सध्या संपूर्ण देशभरात कोरोना रुग्णसंख्या वाढत असताना दुसरीकडे देशभरात युद्ध पातळीवर लसीकरण मोहिमेला सुरवात झालेली आहे. त्यातच सिरमने जाहीर केलेल्या लसीच्या किमतीवरून अनेकांनी सीरमचे प्रमुख आदर पुनावाला यांच्यावर जोरदार टीका केली होती, त्यातच आता सिरम इन्स्टिट्यूटचे सीईओ अदर पूनावाला यांना धमक्या दिल्या गेल्यामुळे वाय दर्जाची सिक्युरिटी दिली गेली आहे.
समोर आलेल्या माहितीनुसार पुण्याच्या सिरममध्ये सरकार व नियमन कार्य प्रमुख म्हणून काम करणारे प्रकाशकुमार सिंग यांनी १६ एप्रिल रोजी केंद्रीय गृहमंत्री अमित शहा यांना एक पत्र लिहिले होते. त्यात पूनावाला यांना लसीच्या मुद्द्यावरून वरून विविध ठिकाणाहून धमक्या मिळत असून त्यांच्या जीवाला धोका आहे असे नमूद केले आहे. त्यामुळे पूनावाला यांना सुरक्षा दिली जावी अशी विनंती पत्रात करण्यात आली होती.
तात्काळ केंद्र सरकारने सदर परिस्थिती लक्षात घेऊन पूनावाला याना वाय दर्जाची सुरक्षा दिली आहे. त्यात सीआरपीएफचे कमांडो पूनावाला यांच्या तैनातीत राहणार आहेत. सिरमने देशात कोविशिल्ड लसीची किंमत वाढविल्याने त्यांच्यावर सडकून टीका केली जात होती. त्या पार्श्वभूमीवर पूनावाला यांनी लसीची किंमत १०० रुपयाने कमी केल्याची घोषणा बुधवारी केली होती. आता ही लस ३०० रुपयात मिळू शकणार आहे.
