नवी दिल्ली | केंद्रात मोदी सरकार स्थापन झाल्यापासून काँग्रेस नेते आणि खासदार राहुल गांधी वेगवेगळ्या विषयावरून मोदी सरकार आणि केंद्राच्या धोरणांवर जोरदार टीका करताना दिसून आले आहेत. त्यातच आता पुन्हा एकदा भाजपासह RSS या संघटनेवर राहुल गांधी यांनी जोरदार निशाणा साधला आहे. संघ आणि भाजपच्या विचारधारेशी काँग्रेस कधीही तडजोड करु शकत नाही. यामुळेच काँग्रेस आणि भाजपत विचारधारेचा संघर्ष आहे, अशा शब्दात काँग्रेसचे नेते राहुल गांधी यांनी बुधवारी मोदी सरकारवर हल्लाबोल केला.
महिला शक्तीचा उल्लेख करुन ते म्हणाले की, लक्ष्मीची शक्ती – रोजगार, दुर्गाची शक्ती – निर्भयता, सरस्वतीची शक्ती – ज्ञान. मात्र, भाजप या सर्व शक्ती हिसकावून घेत आहे. परंतु, आमचा हा संकल्प आहे की, या सर्व शक्ती जनतेपर्यंत पोहोचविण्यासाठी लढाई करु. सावरकर आणि गोडसे यांचा उल्लेख करुन राहुल गांधी म्हणाले की, याच विचारसरणीने महात्मा गांधीजींचा जीव घेतला. संघ आणि भाजप हे नकली हिंदू असल्याची टीका राहुल गांधी यांनी केली.
राहुल गांधी म्हणाले की, आज मीडियाही भयभीत आहे. वास्तव हे आहे की, मोदी यांच्याकडे शक्ती नाही. ते भीतीने कापतात. मोदी यांचे पूर्ण जीवन खोटारडे आहे. ते नेहमीच भिऊन पळालेले आहेत. भाजपच्या काळात महिला भयभीत आहेत. संघ आणि भाजपने कोणत्याही महिलेला पंतप्रधान होऊ दिले नाही.
