अयोध्या | राम मंदिर जामीन घोटाळ्याप्रकरणी आपचे खासदार सिंह यांनी आरोप लागावल्यानंतर भारतीय जनता पक्षावर आणि RSS वर जोरदार टीका करण्यात आली होती. यावर आता भाजपचे खासदार साक्षी महाराज यांनी अजब विधान केले आहे. अयोध्येतील राम मंदिर निर्मितीसाठीच्या जमीन व्यवहारात घोटाळा झाल्याचा आरोप करणाऱ्यांनी देणगी दिल्याची पावती दाखवावी आणि दिलेली देणगी परत घेऊन जावी, असं विधान साक्षी महाराज यांनी केलं आहे.
तसेच जे विरोधक आरोप करतायत त्यांनी याआधी रामभक्तांवर गोळ्या चालवल्या होत्या, असाही घणाघात त्यांनी केला आहे.”बाबरी मशिदीजवळ एक पाखरू देखील जाऊ देणार नाही असा उघड दावा करणाऱ्यांना उत्तर त्यावेळी देण्यात आलं होतं. राम जन्मभूमीवर आज एक भव्य मंदिर उभारलं जाणार आहे. त्यामुळे अशा वायफळ लोकांकडून कोणताही आधार नसलेले आरोप करण्याशिवाय दुसरं कोणतं काम शिल्लक राहिलेलं नाही”, असं साक्षी महाराज म्हणाले.
पुढे बोलताना ते म्हणाले की, “चंपत राय यांनी त्यांचं संपूर्ण जीवन भगवान श्रीराम यांना समर्पित केलं आहे. अशा व्यक्तीवर आरोप करणं योग्य नाही. तरीही आम आदमी पक्षाच्या संजय सिंह यांनी राम मंदिरासाठी काही देणगी दिली असेल तर त्याची पावती त्यांनी दाखवावी आणि देणगी परत घेऊन जावी. अखिलेश यादव यांनी देणगी दिली असेल तर तेसुद्धा देणगी परत घेऊ शकतात. हे तेच लोक आहेत ज्यांनी राम मंदिराला कठोर विरोध केला होता”, असं साक्षी महाराज म्हणाले.
