सध्या राज्यसभा निवडणुकीत सहा जागांसाठी सात उमेदवार उभे असल्याने चुरस निर्माण झाली असून सत्ताधारी आणि विरोधकांमध्ये जोरदार रस्सीखेच सुरु झाली आहे. राज्यसभेच्या या निवडणुकीत, प्रत्येक पक्षाचा उमेदवार फाईव्ह स्टार हॉटेलमध्ये राहत आहे. आपणही या निवडणुकीत फाईव्ह स्टार हॉटेल मध्ये राहणार का? या प्रश्नावर बोलताना आमदार हितेंद्र ठाकूरांनी मिश्किलपणे उत्तर दिलंय.
आमदार हितेंद्र ठाकूर म्हणाले, आपणाला फाईव्ह स्टार हॉटेलमध्ये राहणं परवडणार नाही, आणि आपणाला कोणत्याही पक्षाकडून आमंत्रण ही नाही. खिशात साध्या पाचशे पाचशेच्या दोन नोटा आहेत. आपले साधे वडापावचे वांदे आहेत. आम्हाला परवडते घरच्या घरी, आमच्या सौभाग्यवती चांगल जेवण बनवतात, त्यामुळे आमची तब्येत बरी आहे असा उपरोधात्मक टोला ठाकूर यांनी लगावला आहे.
सध्या राज्यसभा निवडणुकीत सहा जागांसाठी सात उमेदवार उभे असल्याने चुरस निर्माण झाली आहे. यामुळे छोटे पक्ष आणि अपक्ष आमदारांच्या मतांना महत्त्व प्राप्त झाले आहे. असे मागे ठाकूर म्हणाले होते, दरम्यान, माझ्या पक्षाचा किंवा तिन्ही आमदारांच्या पाठिंब्याबाबत पक्षाचे पदाधिकारी, कार्यकर्ते व दोन्ही आमदारांसोबत बसून चर्चा करणार असल्याचे ठाकूर यांनी सांगितले. त्यानंतर निर्णय जाहीर करेन, तोपर्यंत कोणीही आमची तीन मते ग्राह्य धरू नका, असे ते म्हणाले. जे उमेदवार उभे आहेत, त्यांनीही संपर्क साधल्याचे ठाकूर यांनी सांगितले.
