राजस्थान | ग्रामविकास राज्यमंत्री राजेंद्र गुडा यांनी केलेले एक वक्तव्य सध्या चर्चेचा विषय बनले आहे. मंत्री बनल्यानंतर पहिल्यांदाच आपल्या विधानसभा मतदारसंघात पोहोचलेल्या मंत्री गुढा यांच्याकडे लोकांनी खराब रस्त्यांबद्दल तक्रार केली. त्यानंतर त्यांनी पीडब्ल्यूडीच्या मुख्य अभियंत्यांना सांगितले की, ‘माझ्या गावात कतरिना कैफच्या गालासारखे रस्ते बनवा’, असे निर्देश दिले.
अधिकाऱ्याला दम देताना गुढा म्हणाले की, माझ्या गावातील रस्ते हेमा मालिनी यांच्या गालाप्रमाणे बनवा. त्यानंतर लगेच त्यांनीच हेमा मालिनी आता म्हातारी झाल्याचे सांगितले आणि जनतेला विचारले की आजकाल कोणती अभिनेत्री चर्चेत आहे, त्यावर उपस्थितांनी कतरिना कैफचे नाव घेतले. त्यानंतर, माझ्या भागात कतरिना कैफच्या गालासारखा गुळगुळीत रस्ते बनवा, असं ते म्हणाले. बसपातून काँग्रेसमध्ये आलेल्या राजेंद्रसिंह गुढा यांना अशोक गेहलोत यांनी नुकतेच राज्यमंत्री केले आहे.
चित्रपट अभिनेत्रींच्या गालासारखे रस्ते बनवण्याची राजकारण्यांची विधाने यापूर्वी सुद्धा राजकीय नेत्यांनी केली आहेत. यापूर्वी माजी केंद्रीय मंत्री लालू यादव यांच्यापासून अनेक राज्यांच्या मंत्र्यांनी अशी विधाने केली आहेत. 2005 मध्ये पहिल्यांदा लालू प्रसाद यादव यांनी बिहारच्या रस्त्यांबाबत बोलताना, येथील रस्ते हेमा मालिनी यांच्या गालाप्रमाणे गुळगुळीत होतील, असे विधान केले होते.
