औरंगाबाद | खुलताबाद येथील औरंगजेबाच्या कबरीवरून गेल्या काही दिवसांपासून मोठा वाद निर्माण झाला आहे. यामुळे खबरदारीचा उपाय म्हणून खुलताबाद येथील औरंगजेबाची कबर पर्यटक व इतर लोकांसाठी बघण्यासाठी बंद करण्यात आली आहे. या बाबतचा आदेश भारतीय पुरातत्त्व विभागाने बुधवारी दुपारनंतर काढला आहे.
खुलताबाद येथील औरंगजेबाच्या कबरीवर जावून एमआयएमचे वरिष्ठ नेते तेलंगणा चे आ. अकबरोद्दीन ओवेसी यांनी पुष्प अर्पण करून नतमस्तक झाल्याने देशभरात मोठा वाद निर्माण झाला होता. यावरून राजकारण सुरू झाले वादविवाद होत आहे. दरम्यान एका राजकीय पक्षाने औरंगजेबाची कबर तोडण्याची धमकी दिल्याने खुलताबादेत मोठा तणाव निर्माण झाला होता.
पोलीस प्रशासन दर्गा कमिटीच्या पदाधिका-यांनी शेकडो तरूणांची समजूत घालून वातावरण शांत केले होते. पोलीस प्रशासनाने मंगळवारपासून खुलताबाद येथील औरंगजेब कबर व दर्गा परिसरातील मुख्य रस्त्यावर मोठा पोलीस बंदोबस्त तैनात केला होता. तसेच कबर परिसरात सशस्त्र पहारेकरी नेमण्यात आले होते.
बुधवारी ग्रामीण पोलीस अधीक्षक मनिष कलवानिया यांनी औरंगजेब कबर परिसराची पाहणी करून सुरक्षेसंबधी आढावा घेतला होता. बुधवारी दुपारनंतर भारतीय पुरातत्त्व विभागाच्या अखत्यारीत असलेल्या औरंगजेबाची कबर सध्या सुरू असलेल्या दुषित सामाजिक वातावरणामुळे काही दिवस बंद ठेवण्याचा निर्णय घेतला आहे.
