राष्ट्रवादीचे नेते आणि माजी मंत्री एकनाथ खडसे यांनी पुन्हा एकदा भाजप नेत्यांवर निशाणा साधला आहे. जळगावात आयोजित एका कार्यक्रमात खडसे यांनी आपल्या खास शैलीत विरोधकांचा समाचार घेतला. हम तो डूबेंगे सनम लेकिन तुमको भी साथ लेकर डूबेंगे, फार झालं चार काय चार महिने भरके लेंगे पर लेकर डूबेंगे, अशा शायराना अंदाजात एकनाथ खडसे यांनी विरोधकांना इशारा दिला.
गेल्या काही दिवसापासून एकनाथ खडसे आणि भाजप नेते, माजी मंत्री गिरीश महाजनयांच्यातील शाब्दीक युद्ध रंगले आहे. दोन्ही नेते एकमेंकांवर आरोप-प्रत्यारोप करीत आहेत. काल खडसे यांनी गिरीश महाजन यांच्यासह विरोधी पक्षनेते देवेंद्र फडणवीस यांच्यावर टीकास्त्र सोडले होते. आता शायराना अंदाजात त्यांनी निशाणा साधला.
हम तो डूबेंगे सनम लेकिन तुमको भी साथ लेकर डूबेंगे, फार झालं चार काय चार महिने भरके लेंगे पर लेकर डूबेंगे, काय राहिलं आता आयुष्यात सत्तराव्या वर्षी. कशासाठी? कशासाठी हे लोकं बदनामी करत आहेत, असा सवाल खडसे यांनी केला.
यावेळी त्यांनी ईडीचा विषय पुन्हा एकदा छेडला. आता ईडीचा विषय संपला आहे. त्यामुळे मी ईडीला घाबरत नाही. आता प्रकरण कोर्टात आहे. मी फक्त कोर्टाला घाबरतो, असं त्यांनी सांगितलं. काहीही एक संबंध नसताना माझ्या जावयाला यांनी आत टाकले. आज मी ज्या पक्षांमध्ये आहे तो पक्ष राष्ट्रवादी माझ्या पाठीमागे खंबीर पणे उभा आहे, असं त्यांनी स्पष्ट केलं.
