मुंबई | राज्यात आघाडीचे सरकार स्थापन झाल्यापासून भारतीय जनता पक्षाचे नेते आणि केंद्रीय मंत्री आघाडी सरकार आणि मुख्यमंत्री उद्धव ठाकरे यांच्यावर सतत टीका करताना दिसून आलं आहेत. त्यात आता पुन्हा एकदा केंद्रित राज्य मंत्री रावसाहेब दानवे यांनी आघाडी सरकारवर टीका केली आहे. तसेच, पुन्हा एकदा राज्यातील सरकार स्वत:हूनच पडेल, असा विश्वास रावसाहेब दानवे यांनी व्यक्त केला आहे.
एका वृत्तवाहिनीशी बोलताना त्यांनी हा विश्वास व्यक्त केला. यावेळी बोलताना रावसाहेब दानवे यांनी ठाकरे सरकारवर निशाणा साधला. ‘हे तीन पक्षांचं सरकार आहे. यांच्यात ताळमेळ नाहीये. हे एकमेकांच्या पायात पाय घालून पडणारं सरकार आहे.अमर अकबर अँथनी अशी यांची तीन दिशेला तीन तोंडं आहेत. हे सरकार आपापसांतच भांडून पडेल. आम्हाला हे सरकार पाडण्यासाठी काही करण्याची गरजच नाहीये’, असे दानवे यांनी म्हटले आहे.
दरम्यान, अमर, अकबर, अँथनी या विशेषणावरून त्यांनी सरकारला सिनेमाचीच उपमा दिली आहे. ‘सिनेमा कितीही खराब असला आणि एकदा तिकीट काढलं, तर माणसांना पूर्ण वेळ बसावंच लागतं. पण कधीकधी प्रेक्षकांमध्ये प्रक्षोभ झाला, तर अनेक चित्रपट बंद पडताना पाहिलेत. आम्ही त्यांच्या चांगल्या कामांना पाठिंबा देऊ, वाईट कामांना विरोध करू’, असे दानवे म्हणाले आहेत.
