जळगाव | भोसरी जमीन खरेदी प्रकरणात राष्ट्रवादीचे नेते आणि माजी महसूल मंत्री एकनाथ खडसे यांना सर्वात मोठा धक्का बसला आहे. ईडीने खडसे यांची लोणावळा आणि जळगाव येथील मालमत्ता जप्त केली आहे. या मालमत्तांची एकूण किंमत ५ कोटी रुपये असल्याची माहिती समोर येत आहे. हा खडसे यांच्यासाठी मोठा धक्का मानला जात आहे.
मागच्या काही दिवसांपासून एकनाथ खडसे आणि त्यांच्या कुटुंबियांची ईडीकडून कसून चौकशी सुरु आहे. एका प्रकरणात तर खडसे यांचे जावई गिरीश चौधरी यांना ईडीकडून अटक देखील करण्यात आली होती. त्यानंतर आता ईडीने एकनाथ खडसे यांच्या मालमत्तांच्या जप्तीची कारवाई केली आहे. यामध्ये एकनाथ खडसे यांच्या लोणावळा आणि जळगाव येथील मालमत्ताचा समावेश असून मनी लाँडरिंग प्रकरणात एकनाथ खडसेंची चौकशी केली जात असतानाच ही कारवाई करण्यात आली आहे.
ईडीच्या आरोपानुसार २०१६ मध्ये महसूलमंत्री असताना खडसे आणि त्यांचे जावई गिरीश चौधरी यांनी पुण्यातील भोसरी येथे एक भूखंड खरेदी केला होता. हा भूखंड एमआयडीसीच्या मालकीचा होता. त्यावेळी या भूखंडाचा बाजारभाव ३१ कोटी रुपये होता, मात्र अवघ्या ३ कोटी रुपयांमध्ये हा भूखंड विकत घेण्यात आला होता. खडसे यांनी स्वतःच्या अधिकारपदाचा गैरवापर केल्याचा आरोप यामुळेच केला जात आहे.
