मुंबई | माजी खासदार छत्रपती संभाजीराजे यांच्या आवाहनाला प्रतिसाद देत राष्ट्रवादी काँग्रेसचे अध्यक्ष शरद पवार यांनी त्यांच्या राज्यसभेच्या उमेदवारीला पाठबळ देण्याचा निर्णय घेतला. यामागे पवार यांचे छत्रपती घराण्यावरील प्रेम अधोरेखित होत असून त्याचबरोबर महाराष्ट्रात सर्वप्रथम पाठिंबा देऊन जाहीर त्यांच्यावर प्रेम करणाऱ्या लाखो कार्यकर्त्यांची सहानुभूती मिळवण्याची रास्तवराडीची खेळी आता यशस्वी होताना दिसून येत आहे.
ज्येष्ठ नेते शरद पवार व छत्रपती घराणे यांचे फार जुने संबंध आहेत. या घराण्याविषयी पवार यांच्या मनात कमालीचा आदर आहे. त्यातूनच त्यांनी २००४ ला मालोजीराजे यांना ऐनवेळी राष्ट्रवादी काँग्रेसमधून कॉंग्रेसमध्ये पाठवून आमदार केले. २००९च्या लोकसभेला रथी-महारथी राष्ट्रवादीकडे उमेदवारीसाठी प्रयत्नशील असताना त्यांनी संभाजीराजे यांना उमेदवारी देऊन अनेकांना धक्का दिला. या पराभवापासून संभाजीराजे राष्ट्रवादीपासून बाजूला गेले आणि त्यांनी महाराष्ट्रात आपली स्वतंत्र ताकद वाढवली. त्याचे फलित म्हणून भाजपने राष्ट्रपती कोट्यातून त्यांना राज्यसभेवर पाठवले.
राज्यसभेची मुदत संपल्यानंतर संभाजीराजे यांनी स्वत:ची ‘स्वराज्य’ संघटनेबरोबरच राज्यसभा अपक्ष लढण्याची घोषणा केली. राज्यातील सर्वपक्षीयांना आपल्या उमेदवारीला पाठिंबा द्यावा, असे आवाहन त्यांनी केले होते. त्याला पहिल्यांदा प्रतिसाद ज्येष्ठ नेते शरद पवार यांनी देत त्यांच्या उमेदवारीला पाठिंबा दर्शवला.
