मुंबई | मुंबई:शरद पवार हे नास्तिक असल्यामुळे त्यांना हिंदू धर्माविषयी आस्था नाही, या मनसेप्रमुख राज ठाकरे यांच्या वक्तव्याची भाजपकडून री ओढण्यात आली आहे. महाराष्ट्र भाजपच्या ट्विटर हँडलवरून शरद पवार यांच्या साताऱ्यातील भाषणाचा व्हिडिओ ट्विट करण्यात आला आहे. यामध्ये शरद पवार यांनी हिंदू देवीदेवतांचा कशाप्रकारे अपमान केला, हे अधोरेखित करण्याचा प्रयत्न करण्यात आला आहे.
या व्हिडिओमध्ये शरद पवार यांनी या भाषणात जवाहर राठोड यांच्या एका कवितेचा उल्लेख केला होता. हाच धागा पकडत भाजपने शरद पवार यांच्यावर टीकेची झोड उठवली आहे. ‘पवार नेहमीच हिंदू धर्माचा द्वेष करतात. नास्तिक शरद पवार यांनी हिंदू देवी देवतांचे बाप काढालेत. पवारांनी हिंदूं धर्माची बदनामी केली नसती, जातीवाद केला नसता, देवीदेवतांचा अपमान केलाच नसता, तर ते एवढे मोठे झालेच नसते. पवारसाहेब या वयात आपल्याला शोभेल असेच वक्तव्य करा!’, असे भाजपकडून करण्यात आलेल्या ट्विटमध्ये म्हटले आहे.
काय आहे प्रकरण ?
शरद पवार यांनी जातीयवादासंदर्भात बोलताना जवाहर राठोड यांच्या एका कवितेचा उल्लेख केला.मी पूर्वी जेव्हा औरंगाबादला जायचो तेव्हा डॉ. बाबासाहेब आंबेडकर यांनी बांधलेल्या मिलिंद कॉलेजमध्ये उपेक्षित समजातली काही मुलं तिथे शिकायची. शैक्षणिक पार्श्वभूमी नसूनही ही मुलं उत्तम लिखाण करायची. जवाहर राठोड नावाचा एक कवी त्याकाळी वसंतराव नाईक कॉलेजमध्ये शिकवायचा. त्याने त्याच्या कवितेत असं म्हटलंय की, ‘आम्ही आमच्या चीनी हाथोड्यापासून बनवलेल्या जात्यामुळे आज अनेकांचं पोट भरत आहे.
या सोबतच आम्ही अनेक गोष्टी बनवल्या. तुम्ही ज्यांची पूजा करता ते ब्रह्मा, विष्णु, महेश यांच्या मूर्ती आम्ही आमच्या चीनी हातोड्यापासून घडवल्या. त्या तुम्ही मंदिरात ठेवल्या आणि आता आम्हाला मंदिरात येऊ देत नाहीत. तुमच्या देवाचे बाप आम्ही आहोत. त्यामुळे आमच्यावर झालेला अन्याय आम्ही सहन करणार नाही’
