मुंबई | शिवसेना पक्षाच्या आमदार यामिनी यशवंत जाधव सध्या चंगल्याच चर्चेत असलेल्या दिसून येत आहे. आयकर विभागाने त्यांची आमदारकी रद्द करण्याची मागणी थेट निवडणूक आयोगाकडे केली आहे. यामिनी जाधव यांनी २०१९ च्या निवडणुकीवेळी आपल्या संपत्तीची माहिती लपवल्याचं आयकर विभागाचं म्हणणं आहे. आयकर विभागाने त्यांच्या प्रतिज्ञापत्राची चौकशी केली असता हे प्रकरण समोर आलं होत.
विधानसभा निवडणुकीवेळी सादर केलेल्या प्रतिज्ञापत्रानुसार यामिनी जाधव यांच्या संपत्तीत अनियमितता आढळून आल्याचा ठपका निवडणूक आयोगाने त्यांच्यावर ठेवला आहे. जाधव यांनी २०१९ साली निवडणूक आयोगाला सादर केलेल्या प्रतिज्ञापत्रात ७.५ कोटी एवढी मालमत्ता असल्याचं नमुद केल होतं. यामध्ये त्यांची आणि त्यांचे पती यशवंत जाधव यांच्या संपत्तीचा समावेश आहे.
संपत्तीचं विवरण करताना जाधव यांनी त्यांच्याकडे २.७४ कोटींची जंगम मालमत्ता असल्याचं सांगितलं होतं. यशवंत जाधव यांच्याकडे ४.५९ कोटी रूपयांची संपत्ती आहे. तर १.७२ कोटींची जंगम मालमत्ता आहे, असं त्या प्रतिज्ञापत्रात नमुद केलं आहे. पण ही माहिती खोटी आहे. यामध्ये फरक जाणवतोय, असंही आयकर विभागाने स्पष्ट केलं आहे. या माहितीच्या आधारे यामिनी यशवंत जाधव यांची आमदारकी रद्द करण्यात यावी अशी विनंती आयकर विभागाने केली आहे. यावर अद्याप आमदार जाधव यांनी कोणतीही प्रतिक्रिया दिलेली नाही.
