मुंबई | एसटी कर्मचाऱ्यांचं आंदोलन आता चिघळण्याच्या मार्गावर असल्याचं पाहायला मिळत असून एसटी कर्मचाऱ्यांच्या प्रश्नावरुन बेमुदत संपाला अनेक संघटनेनं पाठिंबा जाहीर केला आहे. त्यातील जनशक्ती संघटनेचे कार्यकर्ते आक्रमक झाल्याचं पाहायला मिळत आहे. जनशक्ती संघटनेच्या कार्यकर्त्यांनी आज
परिवहन मंत्री अनिल परब यांच्या घराबाहेर राडा घातला.
यावेळी अनिल परब यांच्या घरावर शाई फेकण्याचा प्रयत्न या कार्यकर्त्यांनी केला. त्यावेळी पोलिसांनी त्यांना अडवलं. तेव्हा रस्त्यावर झोपून त्यांनी आपला निषेध व्यक्त केला. त्यावेळी पोलिसांनी जनशक्ती संघटनेच्या कार्यकर्त्यांना ताब्यात घेतलं आहे. राज्यमंत्री बच्चू कडू यांच्या प्रहार जनशक्ती संघटनेतून अतुल खुपसे बाहेर पडले होते. त्यांनी जनशक्ती संघटना स्थापन केली. त्या संघटनेनं एसटी कर्मचाऱ्यांच्या आंदोलनाला पाठिंबा दिला होता.
या संघटनेचे काही कार्यकर्ते आज गनिमी काव्यानं अनिल परब यांच्या निवासस्थानासमोर पोहोचले. त्यांनी परब यांच्या घरासमोर निदर्शनं केली. इतकंच नाही तर परब यांच्या निवासस्थानावर शाई फेकण्याचाही प्रयत्न या कार्यकर्त्यांनी केला. त्यानंतर पोलिसांनी या कार्यकर्त्यांना ताब्यात घेतलं. या प्रकरानंतर परब यांच्या निवासस्थानासमोर साफसफाईही करण्यात आली.
