राज्यात आघाडीचे सरकार स्थापन झालेले असताना मात्र दुसरीकडे स्थानिक पातळीवर या तिन्ही पक्षातील नेत्यांमध्ये वाद होत असल्याचे चित्र दिसून येत आहे . त्यामुळे आघाडीमध्ये बिघाडी होत असल्याचे चित्र पुन्हा एकदा निर्माण होता दिसून येत आहे. त्यातच आता आता शिवसेनेच्या आमदारांनी नाशिकचे पालकमंत्री छगन भुजबळ यांच्यावर आरोप करत न्यायालयात धाव घेतली आहे. पालकमंत्री भुजबळ निधी विकत असल्याचा आरोप शिवसेना आमदार सुहास कांदे यांनी केला आहे. त्यांनी आता न्यायालयात धाव घेतली आहे.
पालकमंत्री आणि राज्याचे अन्न व नागरी पुरवठा मंत्री छगन भुजबळ ठेकेदारांना निधी विकत असल्याचा आरोप नांदगावचे शिवसेना आमदार सुहास कांदे यांनी केला आहे. निधी वाटपावरून त्यांनी थेट मुंबई उच्च न्यायालयात धाव घेत याचिका दाखल केली आहे. त्यामुळे जिल्हा नियोजन समितीच्या निधीवरून नाशिकमध्ये महाविकास आघाडीमधील वाद चव्हाट्यावर आला आहे.
जिल्हाधिकारी सुरज मांढरे आणि जिल्हा नियोजन समितीच्या अधिकाऱ्यांनादेखील यात प्रतिवादी करण्यात आले आहे. भाजपकडून महाविकास आघाडीच्या मंत्र्यांना टार्गेट केले जात असताना आता आघाडीतील घटक पक्षाचे आमदारच सरकारच्या मंत्र्यावर आरोप करीत असल्याने महाविकास आघाडीतील नेत्यांची चिंता वाढली आहे. भुजबळ जिल्हा नियोजन समितीच्या अध्यक्षपदाचा गैरवापर करीत मर्जीतील आणि समता परिषदेच्या कार्यकर्त्यांना कामे देत असल्याचा गंभीर आरोपही कांदे यांनी केला आहे.
