उस्मानाबाद (राजकीय कट्टा प्रतिनिधी) उस्मानाबाद तालुक्यातील उपळा येथील काँग्रेस पक्षाचे धडाडीचे व एकनिष्ठ कार्यकर्ते रोहित पडवळ यांची उस्मानाबाद काँग्रेस तालुकाध्यक्षपदी नियुक्ती करण्यात आली आहे. या नियुक्तीचे पत्र महाराष्ट्र राज्याचे काँग्रेस पक्षाचे कार्याध्यक्ष व माजी मंत्री बसवराज पाटील व माजी मंत्री मधुकरराव चव्हाण यांच्या हस्ते व काँग्रेस पक्षाचे जिल्हाध्यक्ष अॕड.धीरज पाटील, मावळते तालुकाध्यक्ष लक्ष्मण सरडे यांच्या उपस्थितीत देण्यात आले.
नूतन काँग्रेस तालुकाध्यक्ष रोहित पडवळ हे गेल्या पंधरा वर्षापासून सार्वजनिक जीवनात असून त्यांनी जवळपास नऊ वर्षे संभाजी ब्रिगेडचे जिल्हाध्यक्ष म्हणून काम पाहिले आहे तर चार वर्ष उस्मानाबाद तालुका अध्यक्ष म्हणून देखील त्यांनी संभाजी ब्रिगेडमध्ये काम केले आहे. तसेच त्यांनी युवक काँग्रेसच्या उपजिल्हाध्यक्षपदाची जबाबदारी देखील यशस्वीपणे पार पाडले आहे या सर्व कार्याची दखल घेऊन ते तुळजापूर विधानसभा मतदार संघातील माजी आमदार मधुकरराव चव्हाण यांचे विश्वासू मानले जातात तर बसवराज पाटील यांच्या मार्गदर्शनाखाली ते काम करत असून सर्व संघटनेला ते बरोबर घेऊन जातील असा विश्वास काँग्रेसच्या वरिष्ठ नेत्यांनी त्यांच्या नियुक्त वेळी बोलून दाखविला.
उस्मानाबाद तालुक्यात काँग्रेस पक्षाचे संघटन मजबूत करणार असून ‘प्रत्येक गावात गाव तिथे काँग्रेस पक्षाची शाखा’ हा उपक्रम वरिष्ठांच्या परवानगीने राबवणार आहे. तसेच उस्मानाबाद नगरपालिका व पंचायत समिती,जिल्हा परिषद या निवडणुकीत देखील काँग्रेस पक्षाच्या एकनिष्ठ कार्यकर्त्यांना संधी मिळावी यासाठी वरिष्ठ नेत्यांपर्यंत सच्चा कार्यकर्त्यांची शिफारस करणार आहे. तसेच नवीन राजकारणात येऊ पाहणाऱ्या तरुणांनी काँग्रेस पक्षाचा पर्याय निवडावा कारण याच ठिकाणी त्यांना संधी मिळू शकते असे आवाहनही त्यांनी यावेळी केले.
श्री रोहित पडवळ (नूतन काँग्रेस तालुकाध्यक्ष उस्मानाबाद)
